" بەرەكەسى بالداي، ءبي مەكەنى التاي" اتىنداعى تۇڭعىش رەتكى حالىقتىق ءبي باسەكەسى وزدىرىلدى

作者:     发布日期:2017/3/29     点击数:323

قىدىرقان ايتقابىل ۇلى، قاليوللا قىلشقان ۇلى حابارلايدى.

ەجەلدەن، ونەرلىسىن سۇيەدى ەلى،

كوركەمى، سول ونەردىڭ ءبي ونەرى.

ءتىل، قۇلاقسىز، مىلقاۋ دا تۇسىنەتىن،

ءبي نەتكەن، كەرەمەتتەي كيەلى ەدى.

سەزىمشىل، جاراتىلعان زەردەڭ نەدەن،

جان بارما، بيگە ەرىپ تەربەلمەگەن.

تارتادى، بار جاناردى تولقىن جارىپ،

اققۋداي، كول بەتىندە كولبەڭدەگەن.- دەپ اقىن قۇرمانبەك زەيتىنعازى ۇلىنىڭ جىرلاعانىنداي، ءبي ونەرى، ۇلتىمىزدىڭ ءومىر تاريحىمەن بىتە قايناسقان بەگزات ونەرى. ونەر دەگەن ءتورت ارىپتەن تۇراتىن ءبىر اق اۋىز ءسوزدىڭ كورەرگە كولەمى كوزدەي بولعانىمەن قاسيەتى كولدەي ەكەنىن بىرەۋلەر بىلسە،ەندى بىرەۋلەر بىلە بەرمەسە كەرەك. سان عاسىردىڭ سوقپاعىنان سۇرىنبەي ءوتىپ بىزگە جەتكەن، مايەكتى مادەنيەتىمىز بەن ءداستۇرلى ونەرىمىزدىڭ كوپ ءبولىمى اتا-بابالارىمىزدىڭ ارتىنداعى ۇرپاقتارىنا اماناتتاپ كەتكەن اسىل قازىناسى دەسەك ارتىق ايتقان بولمايمىز، سونىڭ ءبىرى كۇمىس شولپسى سىڭعىرلاپ، ۇكىلى تاقياسى، قوس ەتەك كويلەگى، قۇلاڭ شاشى قۇمىرسقا بەلىنە قۇلاعان قۇلىن ءمۇسىن ارۋلاردىڭ نازدى ءبيى. ول بوگەنايى بولەك ايشىقتى كوركەمونەرىمىزدىڭ ءبىر ءتۇرى.

 مىنە وسىنىڭ ايعاعىنداي  اۆتونوميالى رايوندىق ادەبيەت-كوركەمونەرشىلەر بىرلەستىگىنىڭ ۇيىمداستىرۋىندا، اۆتونوميالى رايوندىق فولكلورشىلار قوعامى، اۆتونوميالى رايوندىق بيشىلەر قوعامى جانە التاي قالالىق حالىق ۇكىمەتىنىڭ جاۋاپتى بولۋىندا، التاي ايزات مادەنيەت اقپارات تاراتۋ شەكتى سەرىكتەستىگىنىڭ قارجىلاي دەمەۋىندە، « ۇلتتاردىڭ بەرەكەلى شاڭىراعى» اتىنداعى شينجياڭ كولەمىندەگى تۇڭعىش كەزەكتى قازاقتىڭ حالىقتىق ءبي جارىسى 26-ناۋرىز التاي ۇلتتار مادەنيەت قيمىل ورتالىعىندا وتكىزىلدى.

اتالعان قيمىلدىڭ تالقى جينالىسى 25-ناۋرىز التاي قالاسىنىڭ جيندۋ مەيرامحاناسىنىڭ جيىن زالىندا وتكەن بولاتىن. تالقى بارىسىندا اۆتونوميالى رايوندىق ادەبيەت-كوركەمونەرشىلەر بىرلەستىگىنىڭ، فولكورشىلارقوعامىنىڭ، بيشىلەر قوعامىنىڭ ۋاكىلدەرى ءار قايسى ورىنداردان كەلگەن مەملەكەت دارەجەلى ءبي رەجيسسەرلەرى مەن ماماندار حالقتىق ءبيدى ۇرپاقتان-ۇرپاققا جالعاستىرۋ، دامىتۋ جاعىندا كەلەلى كەڭەس وتكىزىپ، بۇل رەتكى جارىسقا باپتاپ اكەلگەن ۇكىلى ساڭلاقتاردى بايگەگە قوستى.

بيشىلەر« كۇمىس سىڭعىرى»، « اققۋ»، « ەڭبەك ءبيى»، « قارا جورعا»، « قىز قۋار»، « اق بايان» قاتارلى مىڭ بۇرالعان بيلەرمەن كورەرمەندى كوز ايىم قىلىپ، ءالىسىن- ءالى قۇرمەت شاپالاعىمەن ماراپاتتالسا، شيراقى قيمىل، اسەم وبىرازدارىمەن ءبي ونەرىنىڭ باعا جەتپەس قىمباتتىلىعىن تاعى ءبىر قىرىنان ايگىلەدى. قيمىل سوڭىندا، اۆتونوميالى رايوندىق فولكلورشىلار قوعامىنىڭ ورىنباسار ءتوراعاسى ءيۇسىپ جولداس التاي حالقىنا دەگەن شەكسىز العىسىمەن ءبي ونەرىنە دەگەن قاسيەتى كولدەي كيەلى ۇعىمعا ريزاشىلىعىن ءبىلدىردى.

سوڭىندا، « ۇلتتاردىڭ بەرەكەلى شاڭىراعى» اتىنداعى شينجياڭ كولەمىندەگى تۇڭعىش كەزەكتى قازاقتىڭ حالىقتىق ءبي جارىسىنىڭ باس جۇلدەسىن التاي ايماعىنىڭ ءبيشسى التىناي جۇمابەك قىزى ‹‹كۇمىس سىڭعىرى›› اتتى بيىمەن جەڭىپ السا، شينجياڭ كوركەمونەر ينيستيتۋتىنىڭ ءبيشىسى نۇرشات پەن التاي قالاسىنىڭ ءبيشسى ساۋلە ەكىنشى دارەجەلى سيلىقتى، تارباعاتاي تولى اۋدانىنىڭ بيشىلەرى مەن اقساي قازاق اۆتونوميالى اۋدانىنىڭ جانە تارباعاتاي ايماقتىق ءان-ءبي ۇيىرمەسىنىڭ بيشىلەرى 3-دارەجەلى سيلىقتى ەنشىلەدى، قالعان ونەرپازدار شابىتتاندىرۋ سيىلعىمەن ماراپاتتالىپ ساحىنا تورىنەن كورىندى.

بۇل رەتكى شينجياڭ كولەمىندەگى تۇڭعىش كەزەكتى قازاقتىڭ حالىقتىق بيلەر جارىسى حالقىمىزدىڭ ۇلى مادەنيەت ارناسىنا قوسىلعان ءمولدىر بۇلاق، تىڭ باستاما، ەلەۋلى ۇلەس بولدى. الداعى ۋاقىتتا التايدان باسقا ايماق، اۋدانداردا دا وسىناۋ ءساليقالى جارىس جالعاسىن تاۋىپ، حالىق ساناسىندا، ەل اراسىندا جاتقان ءبي مادەنيەتى جاۋھارلارىن جارقىراتا بەرۋىنە تىلەكتەسپىز!!

كەلۋ قاينارى: التاي اقپارات تورابى

 

上一篇:«ۇلتتار ىنتىماع…  下一篇: